OUmense

Oumense is super cool. Ek het altyd my ouma se gekreukelde voete met handeroom ingesmeer terwyl ek met een oog na die kas loer vanwaar die Quality Street beloning sou kom. My oupa het tot die einde toe so vinnig gestap dat almal met ‘n huppeldraf moes byhou. Hy’t ‘n veldhoed gedra en Nike Air tekkies.

 In Taiwan is die oumense ongelooflik. Hier is nie ouetehuise of inrigtings waarheen hulle gepos kan word sodra hulle nie meer lekker kan sien, of wanneer hulle soms per ongeluk hardop poep nie. Hulle hou aan funksioneer totdat hulle wasembleek en wilgerkrom is. Pas kinders op, speel skaak in die parkies, loop in die middel van die pad sonder om te passop vir die besete verkeer… Soms wonder ek of van die oumense wat jy in die strate sien stap nie miskien alreeds dood is sonder dat hulle dit agtergekom het nie.